گورنمنٹ طبی کالج میں عالمی یوم جذام کے موقع پر بیداری پروگرام کا انعقاد

 

پٹنہ :30جنوری 2025 کو عالمی یوم جذام کے موقع پر شعبہ ماہیت الامراض ،گورنمنٹ طبی کالج واسپتال کی جانب سے بیداری پروگرام کا انعقادکیا گیا۔

پروگرام کی شروعات تلاوت قران پاک سے ہوئی، ڈاکٹر محمد نعمت اللہ نے تلاوت کی۔یہ پروگرام ڈاکٹرمحفوظ الرحمان پرنسپل گورنمنٹ طبی کالج و اسپتال کی سرپرستی میں منعقد ہوا۔ مہما ن خصوصی پروفیسر محفوظ الرحمان کا استقبال شعبہ کے سینئر استاذ پروفیسر توحید کبریا نے پھولوں کا گلدستہ پیش کرتے ہوئے کیا۔ شعبہ علم الادویہ کے صدر، ڈاکٹر محمد انس نے پروگرام کے آرگنائزنگ چیئرمین ڈاکٹر محمد شمیم اختر ،صدر شعبہ ماہیت الامراض گورنمنٹ طبی کالج واسپتال کاپھولوں کا گلدستہ پیش کر کے استقبال کیا، پی جی اسکالر ڈاکٹر سعدیہ تبسم نے پی پی ٹی کے توسط سے جزام کے موضوع پر تفصیل سے روشنی ڈالی۔جس میں اس نے اس مہلک مرض کی روک تھا م ،علاج اور عوامی شعور کی ضرورت و اہمیت پر زور دیا۔ انہوں نے بتا یا کہ جذام ایک دائمی اور متعدی بیماری ہے جو مائکوبیکٹریم لیپری نامی بیکٹیریا کی وجہ سے ہوتی ہے۔ یہ بیماری جلد، اعصاب، آنکھوں اور سانس کی نالی کو متاثر کر تی ہے، جس کے نتیجے میں جلد پر دھبے اوراعصاب متاثر ہوتے ہیں۔بر وقت علاج نہ ہونے کی صورت میں جسمانی معذوری پیدا ہو تی ہے۔ بر وقت تشخیص اور مکمل علاج سے اس بیماری پر قابو پایا جا سکتا ہے اور اس کے پھیلاو¿ کو روکا جا سکتا ہے۔

ڈاکٹر محمد شمیم اختر نے اپنے خطاب میں یونانی طب کے تناظر میں جذام کی تشخیص، اس کے اسباب اور علاج پر تفصیل سے روشنی ڈالی، جس سے حاضرین کو اس مرض کے بارے میں ایک نئی بصیرت حاصل ہوئی۔ انہوں نے اس امر کو بھی یقینی بنایا کہ پروگرام کے ذریعے جذام کے بارے میں پائی جانے والی غلط فہمیوں کو دور کیا جائے اور معاشرے میں اس حوالے سے بیداری پیدا کی جائے۔ ان کی انتھک محنت، تنظیمی صلاحیت اور علمی کاوشوں نے اس پروگرام کو کامیاب بنانے میں کلیدی کردار ادا کیا، جس پر وہ بجا طور پر مبارکباد کے مستحق ہیں۔

اس پروگرام کے سرپرست و مہمان خصوصی ڈاکٹر محمد محفوظ الرحمان نے اس مرض کے سماجی اثرات اور مدر ٹریسا کی اس سلسلہ میں دی جانے والی خدمات کا خصوصی طور پر ذکر کیا نیز طب یونانی میں اس کے علاج و معالجہ پر موجود معلومات کا تذکرہ کیا۔ اسکے علاوہ سابق پرنسپل پروفیسر توحید کبریا نے بھی پروگرام کے شرکاءسے خطاب کیا ، شعبہ علم الادویہ کے صدر و ایسوسیٹ پروفیسر ڈاکٹر محمدانس نے اس مرض پر اظہار خیال کرتے ہوئے اس مرض میں استعمال ہونے والی ادویہ کا ذکر کرتے ہوئے اس کی بیداری کی اہمیت پر زور دیا۔ عالمی یوم جذام کے اس بیداری پروگرام میں ڈاکٹر سیلیش کمار پنکج بھی موجود تھے اور شرکاء سے خطاب کرتے ہوئے اس مرض کی تشخیص و تفتیش پر جدید طبی معلومات پر تفصیل سے روشنی ڈالی۔اس پروگرام کے کوآرڈینیٹرکے فرائض،پی جی اسکا لر ڈاکٹر تنویر نور، ڈاکٹرمحمد نعمت اللہ نے انجام دیا اور پی جی اسکالر ڈاکٹر ندیم اخترنے پروگرام کی نظامت کی۔اخیر میں اسسٹنٹ پروفیسر جناب ڈاکٹر ادیب احمد نے اس پروگرام کی کامیابی پر مہمانان خصوصی ،آرگنازنگ چیئرمین ،کوارڈینیٹر اور شرکاء کا شکریہ کرتے ہوئے پروگرام کے اختتام کا اعلان کیا۔